寫台文工具 · 文法筆記

台語文法筆記。

本站整理的台語文法筆記(說明自寫,例句優先採教典真實句),佮國家教育研究院 TGGL 語法點索引檢索。轉換頁的文法提示點落去,就會跳來遮。

文法筆記(本站整理)

說明自寫、分類自訂。例句優先採教育部臺灣台語常用詞辭典(教典)真實句(標〔教典〕,連官方華語對譯照原句重刊;CC BY-ND 3.0 TW,標示來源),無適配句的主題用自造短句(標〔自造〕);〔自造〕句的對譯佮逐句教學註記是本站加的。筆記會繼續增加。

人稱代名詞

阮、咱:exclusive/inclusive 的分別

台語人稱代名詞單數是 guá(我)、lí(你)、i(伊),無分男女。第三人稱複數兼所有格是 in(𪜶)。

第一人稱複數上愛分的就是「有無包含聽的人」:lán(咱)包含對方,guán(阮;南部腔 gún)無包含對方。「lán tsò-hué khì」是邀請你做伙去;講家內代誌用「guán tau」——你家就是你家,無包含聽的人。

所有格直接黏名詞就好:in tau(𪜶兜)、guán lāu-su(阮老師);若單獨講「我的、你的」才用 ê:guá--ê(我的)。

阮大的對細漢的真照顧 Guán tuā--ê tuì sè-hān--ê tsin tsiàu-kòo. 我們老大對小弟們很照顧。 〔註〕阮=排除式(無含聽者)教典
阮店賣的攏是高級貨 Guán tiàm bē--ê lóng sī ko-kip huè. 我們店裡頭賣的都是高級貨品。 〔註〕阮=排除式所有格教典
咱做伙去! Lán tsò-hué khì! 我們(含你)一起去!自造

參考:TGGL 語法點 006「阮/咱」(阮1·阮2·阮3·咱1·咱2·咱3)・維基學院《閩南語文法》·〈人稱代詞〉(inclusive/exclusive 表)・教育部臺灣台語常用詞辭典(教典)例句——CC BY-ND 3.0 TW,標示來源

否定系統

毋、無、袂、未、免、莫:否定詞點點名

台語否定比華語分較細:m̄(毋)否定意願佮性質;bô(無)否定領有、存在、完成;bē(袂)否定能力佮可能(是「ē 會」的否定)。

語感三分(郭永錕 2016 的教學框架):bô(無)講「事實」(無錢、無去);bē(袂)講「判斷」(袂好看、看袂清楚);m̄(毋)講「意願」(毋去、毋知)。

外沿閣有四个:iáu-buē(猶未)「還沒」;bián(免)「不必」;mài(莫)「別」(阻止的命令);m̄-thang(毋通)「不可以」(警告)。語感攏無仝:mài 是叫你莫去,bián 是講無需要,m̄-thang 是按呢做會出代誌。

答話上利便用 bô 佮 m̄-sī:「Lí ū tsia̍h--bô?」——「Bô!」(有吃嗎?沒有。)

佯毋知 tènn-m̄-tsai 裝作不知道 〔註〕m̄ 否定意願教典
規个㨑起來才袂亂 Kui-ê tsang--khí-lâi tsiah bē luān. 整個捆起來才不會亂。 〔註〕bē 袂——可能否定教典
代誌猶未定著 tāi-tsì iáu-buē tiānn-tio̍h 事情尚未確定 〔註〕iáu-buē 猶未——還沒教典
莫共我亂 mài kā guá luān 不要煩我 〔註〕mài 莫——命令;順紲看 kā教典

參考:TGGL 語法點 024 否定詞群組・TGGL 語法小專欄:無、毋、袂、免、莫各種否定詞的比較・TGGL 語法小專欄:「毋」的否定與疑問・郭永錕(2016)《台語《語法》》講義(第 1 節:否定句)(高雄市政府教育局)・教育部臺灣台語常用詞辭典(教典)例句——CC BY-ND 3.0 TW,標示來源

疑問句

疑問句:疑問詞、句尾「--無/--未」佮「敢」

特指疑問用疑問詞:siánn-mih(啥物,什麼)、tó-uī(佗位,哪裡)、tang-sî(當時,何時)、uī-siánn-mih(為啥物)、án-tsuánn(按怎,怎樣)。

是非疑問上捷用句尾 --bô(…無):tsia̍h-pn̄g--bô?(食飯--無?吃飯了嗎);問完成用 --buē(…未)。

kam(敢)是反詰、確認:「kam m̄ sī」(敢毋是,難道不是)。注意敢毋是「勇敢」彼个敢的語感,是提出質疑的。

是非問用 kám(敢),「好像」是另外的 káⁿ-ná(敢若),音佮意思無仝。潘科元建議推測義的漢字寫「咁」,免共疑問的敢混做伙。句尾輕聲 --bô 是問句,本調 bô 是陳述否定,寫全漢若會誤會著愛標輕聲。

我毋知影伊唱的是啥物調 Guá m̄ tsai-iánn i tshiùnn--ê sī siánn-mih tiāu. 我不知道他唱的是什麼曲。 〔註〕siánn-mih 啥物教典
你敢有食中晝頓? Lí kám ū tsia̍h tiong-tàu-tǹg? 你有沒有吃午餐? 〔註〕kám 敢——是非問教典
你食飯--無? Lí tsia̍h-pn̄g--bô? 你吃飯了嗎? 〔註〕句尾輕聲 --bô自造

參考:TGGL 語法點 035「敢……?」・TGGL 語法小專欄:各種疑問句的比較・TGGL 語法小專欄:……矣、未……、……未?・維基學院《閩南語文法》·〈疑問代詞〉・郭永錕(2016)《台語《語法》》講義(第 1 節:疑問句 8 型——有…無、會…袂、欲…毋、敢、乎、特指)(高雄市政府教育局)・塗豆仁學台語(2024-10-03)臉書〈台語的十個特色文法〉·8–9 無字是非問、敢/káⁿ・教育部臺灣台語常用詞辭典(教典)例句——CC BY-ND 3.0 TW,標示來源

能願佮存在

有/無:領有、存在、完成

ū(有)三个主要用法:領有(ū tsînn 有錢)、存在(toh-tíng ū thng 桌頂有湯)、經驗/完成(guá ū khì--kuè 我有去過)。

否定佮疑問常用 bô(無):Guá bô khì(我沒去);Lí ū khì--bô?(你有去無?)。動詞頭前的 ū/bô 會當標完成或經驗(我有去),毋過 ū 本身嘛是領有、存在——毋是見著 ū 就完成體。台灣華語「我有去」是ùi台語借去的。

「有……無?」是是非問的萬用型,欲練習會當逐項物攏按呢問。

有去無回 ū khì bô huê 〔註〕ū/bô 對比教典
我有去--過台北。 Guá ū khì--kuè Tâi-pak 我去過台北。自造

參考:TGGL 語法點 010「[動詞]+有/無」・TGGL 語法小專欄:有、無、有……無?・維基學院《閩南語文法》·〈完成式動詞組〉(u+動詞 表完成)・塗豆仁學台語(2024-10-03)臉書〈台語的十個特色文法〉·2 有字句(完成;台灣華語常直接挪用)・教育部臺灣台語常用詞辭典(教典)例句——CC BY-ND 3.0 TW,標示來源

能願佮存在

會/袂:能力、可能佮「會使、會當」

ē(會)表能力佮可能:I ē phah-kiû(伊會拍球)。否定是 bē(袂,TGGL 024-02);講技能「不會」是 bē-hiáu(袂曉)。注意「未」(iáu-buē 猶未、句尾 --buē)是另外一个詞,臺羅寫 buē,毋是 bē。

情態詞組照 TGGL 009:ē-sái(會使,可以)、ē-tàng(會當,能夠);否定 bē-sái(袂使)、bē-tàng(袂當)。語感:會使偏許可,會當偏能力所及。臺羅以教典詞條為準:ē-sái、bē-sái。

疑問用「會……袂?」:Mî-á-tsài ē lâi bē?(明仔載會來袂?)句尾袂讀輕聲 --bē。

會使 ē-sái 可以 〔註〕詞條——臺羅 ē-sái教典
袂使 bē-sái 不行 〔註〕詞條——bē-sái教典
講袂來 kóng bē lâi 說不通、不會說 〔註〕bē 可能否定教典
按呢會使無? Án-ne ē-sái--bô? 這樣可以嗎?自造

參考:TGGL 語法點 009「會/袂+使/當」・TGGL 語法小專欄:會、袂、會……袂?・TGGL 語法小專欄:會/袂使、會/袂當、會/袂[動詞]得・教育部臺灣台語常用詞辭典(教典)例句——CC BY-ND 3.0 TW,標示來源

連接佮處置

佮:連詞「和」嘛是介詞「跟」

kah(佮)做連詞,連兩个對等的名詞:Tâi-pak kah Tâi-lâm(台北佮台南)。

做介詞是「跟、和」的意思,後壁常孤做伙:kah i tsò-hué(佮伊做伙,和他一起)。

一个常見的混淆:佮(kah,佮人做伙)佮共(kā,對人做代誌)無仝——共看後一篇。

代誌佮你所想的差真濟 Tāi-tsì kah lí sóo siūnn--ê tsha tsin tsē. 事情跟你所想的差很多。 〔註〕kah 佮=佮/跟教典
陳的佮王的咧加話 Tân--ê kah Ông--ê leh ke-uē. 老陳跟老王兩人在爭論。 〔註〕佮+leh 雙點教典

參考:TGGL 語法點 007「佮」・TGGL 語法小專欄:「佮」的用法及讀音解析・維基學院《閩南語文法》·〈介系詞正詞法〉(gaq 與)・教育部臺灣台語常用詞辭典(教典)例句——CC BY-ND 3.0 TW,標示來源

連接佮處置

共:對人/處置「把」

kā(共)會當共受事提到動詞頭前,親像華語「把」:Kā mn̂g kuan--khì(共門關--去,把門關上)。

「kā+人+動詞」是對某人做動作(華語「跟/對」):Guá kā i kóng(我共伊講,我對他說)。佮 kah 的分別:kā 是單向「對伊做」,kah 是「佮伊做伙」。

命令句「共我……」語氣真重:Kā guá thèng-hāu(共我等,給我等著)。

共伊交關 kā i kau-kuan 向他買東西 〔註〕kā+人+動詞教典
你免想欲共我創景 Lí bián siūnn beh kā guá tshòng-kíng . 你別想捉弄我。 〔註〕kā+我教典
共門關--去。 Kā mn̂g kuan--khì. 把門關上。自造

參考:TGGL 語法點 108「共」群組(共+[對象]+[動作]、共(伊)、共我、共……做……)・維基學院《閩南語文法》·〈句法:主語+gaq+受詞+動詞(主動/處置語態)〉・塗豆仁學台語(2024-10-03)臉書〈台語的十個特色文法〉·1 共字句(賓語提前;部份動詞限定用 kā)・教育部臺灣台語常用詞辭典(教典)例句——CC BY-ND 3.0 TW,標示來源

連接佮處置

予:給、被、讓

hōo(予)是台語上無閒的虛詞之一,四个主要用法:給(物件轉移):tsit pún tsheh hōo lí;被(被動):guá hōo i mà(我予伊罵);讓(使役):hōo i khì(予伊去);予人=「令人」。

被動句 hōo 後壁定定接施事者(誰做的):Thng hōo i lim--liáu(湯予伊飲--了)。無講是啥人的時,口語會用泛指「予人」。這是常見句式,毋是維基學院頁面的結論。

一个陷阱:hōo(予)佮 hōo…去(予…去)有時華語攏翻「給」,但是台語語感無仝——多看語例上實在。

伊去予人修理 i khì hōo lâng siu-lí 他被修理了 〔註〕hōo 被動(予人)教典
坐予好勢 tsē hōo hó-sè 坐好 〔註〕hōo 到妥當狀態教典
水電的工程貿予張的做 Tsuí-tiān ê kang-tîng bāu hōo Tiunn--ê tsò. 水電工程包給姓張的做。 〔註〕hōo 給(發包)教典

參考:TGGL 語法點 109「予」群組(予1+[賓語]、予3/4+[對象]+[動詞]、予5(伊))・維基學院《閩南語文法》·〈句法〉(閩拼 ho 被動句式;跨方言參考,臺羅以 TGGL 為準)・教育部臺灣台語常用詞辭典(教典)例句——CC BY-ND 3.0 TW,標示來源

時貌

咧、矣、bat:進行、完成、經驗

台語的時貌靠虛詞標記,無華語「了、著、過」的一一對應。leh/teh(咧)是進行貌:教典例句拼 teh(風咧吹 Hong teh tshue),口語佮 TGGL 嘛定定拼 leh;閣會當講 tng-leh(當咧)。

--ah(--矣)是完成/變化貌,讀輕聲:I tsia̍h-pá--ah(伊食飽--矣)。否定「還沒」用 iáu-buē(猶未):Guá iáu-buē tsia̍h-pn̄g。

經驗貌用 bat…--kuè(bat…過):Guá bat khì--kuè Tâi-pak(我捌去--過台北)。bat 單獨也會使:Lí bat khuànn--tio̍h i--bô?(你捌看--著伊無?)

風咧吹 hong teh tshue 風在吹 〔註〕教典拼 teh——進行貌教典
伊來一霎仔久就轉去矣 I lâi tsi̍t-tiap-á-kú tō tńg--khì--ah. 他來一下子就回去了。 〔註〕--ah 完成教典
以前美國捌向日本宣戰 Í-tsîng Bí-kok bat hiòng Ji̍t-pún suan-tsiàn. 以前美國曾經向日本宣戰。 〔註〕bat 捌=曾經(教典釋義「曾經」)教典

參考:廖淑鳳(2007)〈國小台語教科書基本句型練習研究〉第三章(3.1.2 時態語:完成/未來/經驗/進行)(國立臺灣師範大學碩士論文)・TGGL 語法小專欄:……矣、未……、……未?・維基學院《閩南語文法》·〈完成式動詞組〉(u+動詞 表完成)・塗豆仁學台語(2024-10-03)臉書〈台語的十個特色文法〉·3 咧字句(進行=咧+動詞/動詞+咧)・教育部臺灣台語常用詞辭典(教典)例句——CC BY-ND 3.0 TW,標示來源

複句關鍵字

若…就…、愈…愈…、那…那…:兩个「那」莫混

假設用 nā…tō…(若…就…):Nā lo̍h-hōo, tō mài khì(若落雨,就莫去)。

單獨的「愈」是副詞「更加」;教典詞條拼 jú,口語定定聽 lú,兩款攏有效。連用 lú…lú… 了後,後項的程度綴前項遞增,語意總合已經無仝——李淑鳳(2013)因此把連用的「愈…愈」看做連詞,毋是兩個副詞相加。

ná…ná…(那…那…)有兩款,莫混:一款佮「愈…愈」仝款(Ná khuànn ná tshuè,那看那趣=愈看愈有趣),連用了後是連詞;另外一款是「邊…邊」(I ná kiânn ná chhiò,伊那行那笑),連用了後猶原是副詞,語意無產生新的因果。

愈想愈凝 jú siūnn jú gîng 愈想愈懊惱 〔註〕教典拼 jú——遞增連用教典
愈狂愈走傱 jú kông jú tsáu-tsông 越急越慌亂 〔註〕jú…jú 遞增教典
那行那看 ná kiânn ná khuànn 一邊走一邊看 〔註〕ná=邊…邊教典
若落雨,就莫去。 Nā lo̍h-hōo, tō mài khì. 如果下雨,就別去。自造

參考:廖淑鳳(2007)〈國小台語教科書基本句型練習研究〉第三章(3.2 複句句型及關鍵字:假設句、比較句、選擇句)(國立臺灣師範大學碩士論文)・TGGL 語法點 007「佮」(並列連接)・李淑鳳(2013)〈台語連詞和副詞的關聯性〉,《台灣學誌》第7期,頁21–55(連用「愈…愈」歸連詞;「那」分遞增佮同時兩款)・教育部臺灣台語常用詞辭典(教典)例句——CC BY-ND 3.0 TW,標示來源

語氣詞

lah、leh、ho͘ⁿh、niā-niā:語氣詞

語氣詞黏佇句尾,數量有限、頻率懸。--lah(啦)口語定定用佇勸告、決定:Lí lâi--lah(你來--啦)。廖淑鳳(2007)分析教科書的時,把 lah 歸佇「完成」類——分類標準無仝,毋通當成唯一規則。--leh(咧)會當是輕聲提醒:Tsiânn--leh(靜--咧);咧嘛是進行貌(看時貌篇),兩個愛分開。

hooNnh(乎)是不確定、推敲的疑問語氣:Lí ē lâi--hooNnh?(你會來--乎?)——佮 --bô 的是非問無仝,hooNnh 是「我猜是按呢,是無?」的語感。

niā-niā(爾爾)是「而已、不過如此」:Tsi̍t ê niā-niā(一个爾爾)。

你來--啦。 Lí lâi--lah. 你來吧。自造
靜--咧。 Tsiânn--leh. 安靜點。自造
你會來--乎? Lí ē lâi--hooNnh? 你會來吧?(不確定的推敲)自造
一个爾爾。 Tsi̍t ê niā-niā. 一個而已。自造

參考:廖淑鳳(2007)〈國小台語教科書基本句型練習研究〉第三章(教科書語氣詞表把 lah 歸完成類;本篇口語用法是另行整理)

特色句法

補語後置:讀冊了、鹹 kah

華語把補語插佇動詞佮賓語中間(讀完書)。台語口語定定是「動詞+賓語+補語」:讀冊了,毋是讀了冊。

若補語是另外一个動詞(切了、煮好),頭前的動詞愛重講一擺:切菜切了。無重講,聽的人會當理解做「先去切菜,好矣」的語氣。

形容詞的程度補語嘛後置,用 kah:這碗湯鹹 kah(鹹得很)。

讀冊了才歇困。 Tha̍k tsheh liáu tsiah hio-khùn. 讀完書再休息。自造
切菜切了才煮。 Tshiat tshài tshiat liáu tsiah tsú. 切好菜才煮。自造
這碗湯鹹 kah。 Tsit uánn thng kiâm kah. 這碗湯鹹得很。自造

參考:塗豆仁學台語(2024-10-03)臉書〈台語的十個特色文法〉·4–5 複合動詞補語後置、形容詞補語後置

特色句法

主題先講,評論後置

台語愛先共話題擲出來,後面才講對伊的評論或要求。華語較捷講「借我兩本書」;台語會講「冊兩本借我」。

仝款:「湯燒,逐家攏驚」是先講話題「燒湯」,才講「逐家攏驚」。這毋是倒裝錯誤,是主題優先。

冊兩本借我。 Tsheh nn̄g pún tsioh guá. 借我兩本書。自造
湯燒,逐家攏驚。 Thng sio, ta̍k-ke lóng kiaⁿ. 湯很燙,大家都怕。自造

參考:塗豆仁學台語(2024-10-03)臉書〈台語的十個特色文法〉·6 主題優先,補語後置

特色句法

比較:A 較形容詞 B

台語比較是「A+(khah)+形容詞+B」,毋是華語「A 比 B 形容詞」。無物 khah 芳這蕊花=沒有東西比這朵花香。khah 有時會當省,但是初學先寫出來較穩。

這款句無「比」字。年紀嘛用仝款:伊 khah 大漢我。

物件買二手的較俗 Mi̍h-kiānn bé jī-tshiú--ê khah sio̍k. 東西買中古的比較便宜。 〔註〕khah 較教典
外口較涼 guā-kháu khah liâng 外面比較涼 〔註〕khah 較教典
這條路較近彼條。 Tsit tiâu lōo khah kīn hit tiâu. 這條路比那條近。自造

參考:塗豆仁學台語(2024-10-03)臉書〈台語的十個特色文法〉·7 比較句式 A 較 adj. B・教育部臺灣台語常用詞辭典(教典)例句——CC BY-ND 3.0 TW,標示來源

輕聲變義

輕聲會改意思:揣無/揣--無

仝款漢字,有無輕聲記號(--)意思會無仝。上常見是動詞後壁的 bô:本調是「做無成」(揣無=找不到),輕聲 --bô 是問「做不做」。寫全漢若會誤會,愛標輕聲。揣無、聽無、看無是教典詞條(本調 bô「V 不成」);輕聲問句 --bô 教典例句內底無收,對照是本站自造。

塗豆仁學台語列有一寡固定對照(有影、買、後日等)。本篇無重刊彼套原句,只用自造的動詞對照說明機制。媒體若用華語稿直譯來讀,這款對比上常消失。

揣無。/揣--無? Tshuē bô./Tshuē--bô? 找不到。/找不找?自造
聽無。/聽--無? Thiann bô./Thiann--bô? 聽不懂。/聽到了嗎?自造
看無。/看--無? Khuànn bô./Khuànn--bô? 看不懂。/看到了嗎?自造

參考:塗豆仁學台語(2024-10-03)臉書〈台語的十個特色文法〉·10 輕聲變義(框架;例句自造,無重刊原句)

指示詞

這/彼、遮/遐、這馬:指示詞

指物用 tsit-/hit-(這/彼)加量詞:tsit ê(這个)、hit ê(彼个);指所在用 tsia/hia(遮/遐);複數「這些、那些」是 tsia-ê/hia-ê(遮的/遐的)。

時間指示:tsit-má(這馬,現在)佮 khah-tsá(較早,以前)對比;tsiah/hiah(遮爾/遐爾)是程度「這麼/那麼」。

教典例句「伊較早咧作田,這馬咧做生理」一句鞠三个點:較早、這馬、進行貌 teh。

伊較早咧作田,這馬咧做生理 I khah-tsá teh tsoh-tshân, tsit-má teh tsò-sing-lí. 他早先是在種田,現在是在做生意。 〔註〕較早/這馬對比+teh 進行教典
這个囡仔真乖巧 Tsit ê gín-á tsin kuai-khá. 這個孩子聰明伶俐,討人喜歡。 〔註〕tsit ê 這个教典
遮的物件攏是免稅的 Tsia-ê mi̍h-kiānn lóng sī bián-suè--ê. 這些東西都是免稅的。 〔註〕tsia-ê 遮的=這些教典
遐有一台哹哹 Hia ū tsi̍t tâi pu-pu. 那裡有一輛車車。 〔註〕hia 遐=那裡教典

參考:TGGL 語法點 017「這/彼」・TGGL 語法點 018「遮/遐」群組・維基學院《閩南語文法》·〈指示代詞〉(閩拼;跨方言參考)・教育部臺灣台語常用詞辭典(教典)例句——CC BY-ND 3.0 TW,標示來源

補語

趨向補語:--起來、--落去、--轉來

動詞後壁會當接送趨向的補語(來、去、起來、落去、出去、入來),講的時陣補語讀輕聲,寫做 -- 相接:Tó--lo̍h-khì(倒落去;教典詞條拼 Tó)。

趨向會當疊兩層:phak--lo̍h-khì(仆--落去)、mau--lo̍h-khì--ah(㧌--落去--矣,趨向+完成)。

方向義有時會虛化:tńg--lâi(轉--來)是「回來」,m̄-thang tshut--khì(毋通出去)的 khì 嘛是輕聲尾。

倒落去 Tó--lo̍h-khì. 倒下去。 〔註〕雙輕聲趨向補語教典
伊跋一下規个人仆落去 I pua̍h tsi̍t-ē kui-ê lâng phak--lo̍h-khì. 他跌得整個人撲倒在地。 〔註〕仆--落去教典
伊昨昏三更半暝才轉來 I tsa-hng sann-kenn-puànn-mê tsiah tńg--lâi. 他昨天三更半夜才回來。 〔註〕tńg--lâi 轉--來教典
伊規工攏佇厝裡無出去 I kui-kang lóng tī tshù--lí bô tshut--khì. 他整天都在家沒出門。 〔註〕tshut--khì 出去(輕聲尾)教典

參考:廖淑鳳(2007)〈國小台語教科書基本句型練習研究〉第三章(3.1.2 趨向補語讀輕聲)・維基學院《閩南語文法》·〈動詞短語〉(V+方向動詞,多輕聲)・教育部臺灣台語常用詞辭典(教典)例句——CC BY-ND 3.0 TW,標示來源

補語

試行貌:V 看覓、V--一下、VV--咧

動詞後壁加 khuànn-māi(看覓)是「試試看」:kau-sia̍p khuànn-māi(交涉看覓)。看覓後壁閣會當 tah --leh(看覓咧),語氣較軟。

另外兩款:V+--tsi̍t-ē(--一下,借我看一下)佮動詞重疊 VV--leh(行行咧、看看咧)——動作放慢、放輕的語感。

「試看覓」tshì-khuànn-māi 已經做一個固定詞。

你去交涉看覓 Lí khì kau-sia̍p khuànn-māi. 你去交涉看看。 〔註〕V+看覓教典
我想欲捻一塊粿來食看覓 Guá siūnn-beh liàm tsi̍t tè kué lâi tsia̍h khuànn-māi. 我想要捏取一塊糕來吃看看。 〔註〕來+V+看覓教典
家己先照鏡看覓咧,才袂卸世眾 Ka-kī sing tsiò-kiànn khuànn-māi--leh, tsiah bē sià-sì-tsìng. 自己先反省看看,才不會貽笑大方。 〔註〕看覓+咧教典

參考:廖淑鳳(2007)〈國小台語教科書基本句型練習研究〉第三章(3.1.2 嘗試動補:V+看覓咧/V--一下/V--咧)・TGGL 語法點 028「[動詞重疊]+--咧」・教育部臺灣台語常用詞辭典(教典)例句——CC BY-ND 3.0 TW,標示來源

特色句法

輸贏佮「上蓋」:比較的另一路

「較」以外,台語嘛用 iânn(贏)/su(輸) 做比較動詞:khah iânn(較贏)=划得來;A iânn B=A 贏過 B。

最高級用 siōng-kài(上蓋)抑是 siōng(上):上蓋好=最好。TGGL 149 有專門語法點。

「拚輸贏」是固定詞——爭勝負。

俗賣減趁較贏了錢 Sio̍k-bē kiám-thàn khah iânn liáu-tsînn. 賤賣少賺些還是比賠錢好。 〔註〕khah iânn 較贏教典
比賽會贏會輸無包穩的 Pí-sài ē iânn ē su bô pau-ún--ê. 比賽有贏有輸沒有一個定數。 〔註〕iânn/su 對比教典
占贏毋占輸 Tsiàm-iânn m̄ tsiàm-su. 只想佔上風,不想屈居下風。 〔註〕諺語式用法教典

參考:TGGL 語法點 149「上蓋……」・維基學院《閩南語文法》·〈比較句型〉(贏/輸/上概)・教育部臺灣台語常用詞辭典(教典)例句——CC BY-ND 3.0 TW,標示來源

疊字

疊字形容詞:紅紅、白白、清清咧

單音節形容詞重疊(AA)連寫:âng-âng(紅紅)、pe̍h-pe̍h(白白),程度加強、畫面較活。常常 kah 程度補語 kah 做伙出現:tsia̍h kah tshuì-khoo âng-âng(食甲喙箍紅紅)。

動詞嘛會當輕疊加 --leh:tshing-tshing--leh(清清咧,清理一下)——這就接去「試行貌」彼篇。

三疊(âng âng-âng)佮 AABB、ABAB 的進一步變化,TGGL 053–056 有專門語法點。

你是食啥食甲喙箍紅紅? Lí sī tsia̍h siánn tsia̍h kah tshuì-khoo âng-âng? 你是吃什麼吃得嘴邊紅紅的? 〔註〕kah 補語+AA 疊字教典
白白布染甲烏 Pe̍h-pe̍h pòo ní kah oo. 一塊純白的布料被染成黑的。比喻一個人被抹黑了。 〔註〕pe̍h-pe̍h 白白教典
咱共灶跤清清咧 Lán kā tsàu-kha tshing-tshing--leh. 我們把廚房清理一下。 〔註〕VV--leh 輕疊教典

參考:TGGL 語法點 053–056 形容詞重疊 AA/AABB/ABAB、動詞重疊・維基學院《閩南語文法》·〈形容詞正詞法〉(二重疊/三重疊;閩拼)・教育部臺灣台語常用詞辭典(教典)例句——CC BY-ND 3.0 TW,標示來源

變調

方位詞頭前的本調佮變調:頂面/頂、內面/內

方位詞有雙音節(tíng-bīn 頂面、lāi-bīn 內面、guā-kháu 外口、ē-kha 下跤)佮單音節(頂、內、口、跤)兩款。

變調規則(TGGL 專欄整理):雙音節方位詞頭前的名詞,上尾音節唸本調;單音節方位詞頭前,上尾音節唸變調。書寫攏是分寫,差別佇唸的調。

「以+方位詞」(poo-bíng í-lāi 八百公尺以內)是固定結構,「以」頭前唸本調;「數字+量詞」的場合「以」會當省——省了後頭前彼字就對本調改唸變調(八百公尺內)。TGGL 133 有專門語法點。

物件囥佇桌頂 Mi̍h-kiānn khǹg tī toh tíng. 東西放在桌上。 〔註〕toh tíng 桌頂教典
市場外口有人咧拚俗貨 Tshī-tiûnn guā-kháu ū-lâng teh piànn sio̍k-huè. 市場外面有人在拋售便宜貨。 〔註〕guā-kháu 外口教典
這跤皮箱內底貯啥物? Tsit kha phuê-siunn lāi-té té siánn-mih? 這只皮箱裡面裝什麼東西? 〔註〕lāi-té 內底教典

參考:TGGL 語法小專欄:方位詞前的名詞變調讀法(「以+方位詞」結構;雙音節=本調、單音節=變調)・TGGL 語法點 133「以+[方位]」・維基學院《閩南語文法》·〈空間名詞〉(閩拼;跨方言參考)・教育部臺灣台語常用詞辭典(教典)例句——CC BY-ND 3.0 TW,標示來源

數量詞

數量詞:一台車、兩百箍、偌濟錢

數詞+量詞+名詞:tsi̍t tâi tshia(一台車)、tsi̍t ki tik-á(一枝竹仔)。量詞真豐富(台、枝、欉、丸、塊),佮華語無一一對應。

問「多少」用 guā-tsuē(偌濟):guā-tsuē tsînn(偌濟錢);「幾」用 kuí( kuí ê 幾个)。

數字有文白兩讀(一 tsi̍t/it、二 nn̄g/jī、三 sann/sam),一般算數用白讀、序數佮編號用文讀——規則複雜,TGGL「台語數字的讀法」專欄整理了透徹。

頭家,弓蕉一斤偌濟錢? Thâu-ke, king-tsio tsi̍t kin guā-tsē tsînn? 老闆,香蕉一斤多少錢? 〔註〕guā-tsuē 偌濟+量詞 kin 斤教典
遮的上加是兩百箍 Tsia-ê siōng-ke sī nn̄g pah khoo. 這些頂多兩百元。 〔註〕nn̄g pah 兩百(白讀)教典
你一月日趁偌濟錢? Lí tsi̍t gue̍h-ji̍t thàn guā-tsē tsînn? 你一個月賺多少錢? 〔註〕guā-tsuē 問薪水教典

參考:TGGL 語法小專欄:台語數字的讀法(文白異讀、序數、電話號碼)・維基學院《閩南語文法》·〈基序數詞與合成數詞〉(閩拼)・教育部臺灣台語常用詞辭典(教典)例句——CC BY-ND 3.0 TW,標示來源

語氣詞

語氣詞--ooh(喔):提醒佮感嘆

lah、leh、ho͘ⁿh 以外,教典例句閣定定出現 --ooh(喔)——提醒、感嘆的語氣,親像「勞力--ooh!」(謝啦!)。

--ooh 佮句尾本調 oh 無仝:輕聲的 --ooh 是語氣詞(袂使得--ooh),教典直接用輕聲符號標。

規則性的整理看「lah、leh、ho͘ⁿh、niā-niā」彼篇;這篇補教典實例。

這件代誌予你加真麻煩,勞力喔! Tsit kiānn tāi-tsì hōo lí ke tsin mâ-huân, lóo-la̍t--ooh! 這件事讓你添麻煩了,謝謝你! 〔註〕--ooh 道謝語氣(勞力=多謝)教典
你莫看伊人一疕仔囝,伊力頭真飽喔! Lí mài khuànn i lâng tsi̍t-phí-á kiánn, i la̍t-thâu tsin pá--ooh! 你別看他是個小不點,他力氣可大著! 〔註〕--ooh 感嘆教典
家己的工課拖甲欲袂赴矣才欲哭賴人是袂使得喔! Ka-kī ê khang-khuè thua kah beh bē-hù--ah tsiah beh khàu-luā--lâng sī bē-sái--tit oh! 自己的工作拖到快來不及了才要哭著賴給別人是不行的唷! 〔註〕--ooh 警告語氣教典

參考:教育部臺灣台語常用詞辭典(教典)例句——CC BY-ND 3.0 TW,標示來源

連接佮處置

予……--去:被動的完成佮允許

hōo…--khì(予……--去)是被動句加上趨向補語:官方對譯「厝煞予銀行估去」=「房子卻被銀行拿去抵債」、「毋通予伊騙去」=「別讓他給騙了」——受事去予人「估去」「騙去」,有轉移、受害的完成感。

允許義嘛定定用 hōo i khì(予伊去,讓他去);命令句尾閣加 --lah(予伊去--啦)。

佮「予」彼篇(hōo 給/被/讓)做伙看:這篇專講結尾 --khì 的變化。

伊真久無納貸款,厝煞予銀行估去 I tsin kú bô la̍p tāi-khuán, tshù suah hōo gîn-hâng kóo--khì. 他太久沒繳貸款,房子卻被銀行拿去抵債。 〔註〕被動+--去(受事轉移)教典
阿達仔是一个佬仔,你毋通予伊騙去 A-ta̍t-á sī tsi̍t ê láu-á, lí m̄-thang hōo i phiàn--khì. 阿達是個騙子,你別讓他給騙了。 〔註〕允許/受害+--去教典
予伊去啦!莫插伊 Hōo i khì--lah! Mài tshap--i. 讓他去啦!別理他。 〔註〕允許+命令 --lah教典

參考:TGGL 語法點 109「予」群組・教育部臺灣台語常用詞辭典(教典)例句——CC BY-ND 3.0 TW,標示來源

時貌

當咧(tng-teh):進行貌的強調

進行貌基本是 teh/leh(咧),看「咧、矣、bat」彼篇。欲強調「正當彼當時」,頭前加 tng(當):tng-teh(當咧)。

教典例句「……看著大漢查某囝當咧煮矣」是敘述看著的當時,動作已經佇咧進行——tng-teh 佮句尾 --ah 連用,語感是「已經在煮了」。

教典例句的芥菜「當咧出」(正當產季)顯示 tng-teh 嘛會當表示正當某個時節。

老師當咧課堂上課 Lāu-su tng teh khò-tn̂g siōng-khò. 老師正在教室裡面授課。 〔註〕tng-teh 強調進行教典
伊當咧困難,你就小共伊鬥相共一下 I tng-teh khùn-lân, lí tō sió kā i tàu-sann-kāng--tsi̍t-ē. 他正當窮困,你就稍微幫忙他一下。 〔註〕tng-teh 引伸:正處於(困難)教典
予𪜶兩个去仙拚仙,咱蹛邊仔看戲就好 Hōo in nn̄g ê khì sian-piànn-sian, lán tuà pinn--á khuànn hì tō hó. 讓他們去拚鬥,我們在旁邊看戲就好。 〔註〕複句語感句(做伙複習)教典

參考:廖淑鳳(2007)〈國小台語教科書基本句型練習研究〉第三章(3.1.2 進行式動詞組:當咧/咧)・教育部臺灣台語常用詞辭典(教典)例句——CC BY-ND 3.0 TW,標示來源

諺語熟語

諺語熟語:一兼二顧、校長兼摃鐘

教典收真濟俗諺,官方華語對譯直接說明比喻義。讀諺語是文法總複習——一句底豆 often 有三四個虛詞做伙出現。

「一兼二顧,摸蜊仔兼洗褲」用 kiam(兼)做連接;「校長兼摃鐘」嘛是 kiam。

「倖豬夯灶,倖囝不孝」是教誨型諺語;「惹熊惹虎,毋通惹著刺查某」用 m̄-thang(毋通)+jia̍h--tio̍h(惹--著)的結構。

一兼二顧,摸蜊仔兼洗褲 It kiam jī kòo, bong lâ-á kiam sé khòo. 比喻二者兼顧。 〔註〕kiam 兼+二者兼顧教典
校長兼摃鐘 Hāu-tiúnn kiam kòng-tsing. 校長兼工友。比喻包辦所有事情。 〔註〕kiam 兼教典
倖豬夯灶,倖囝不孝 Sīng ti giâ tsàu, sīng kiánn put-hàu. 比喻子女要加以管教,不能放縱,否則會變成不孝。 〔註〕教誨諺教典
石頭浸久嘛會上青苔 Tsio̍h-thâu tsìm kú mā ē tshiūnn-tshenn-thî. 石頭浸久了也會長青苔。比喻從事某一工作,時間久了也會有所成就。 〔註〕嘛 bē…(mā)也會;勵志諺教典

參考:教育部臺灣台語常用詞辭典(教典)例句——CC BY-ND 3.0 TW,標示來源

特色句法

共我+動詞:對人的句式

kā guá(共我)+動詞是固定的對人句式:Lí kā guá ē-kì--leh!(你共我會記咧!)=「你給我記住!」——命令、警告語氣真重。

無仝於命令的場合,kā+人就是「對/向/替」:I kā guá tò-siàu(伊共我倒數,他欠我錢不還);你若想欲 kā guá tsioh-tsînn(共我借錢)。

「共我」佮「予我」愛分:kā 是對我做、hōo 是給我受益/受害,看「予」佮「共」兩篇。

你共我會記咧! Lí kā guá ē kì--leh! 你給我記住! 〔註〕kā guá+V 命令教典
伊共我倒數 I kā guá tó-siàu. 他欠我錢不還。 〔註〕kā=對(欠我)教典
你若想欲共我借錢,就愛先揣一个保家 Lí nā siūnn-beh kā guá tsioh-tsînn, tō ài sing tshuē tsi̍t ê pó-ke. 你如果想向我借錢,就要先找一個保人。 〔註〕nā 若+kā+人教典
伊閣咧共我供體矣 I koh teh kā guá king-thé. 他又對我冷嘲熱諷了。 〔註〕koh+teh+kā 三點教典

參考:TGGL 語法點 108「共」群組(共+[對象]+[動作]、共我……)・教育部臺灣台語常用詞辭典(教典)例句——CC BY-ND 3.0 TW,標示來源

疑問句

句尾疑問系統:--無、--未、--呢

是非問的句尾助詞是一組:--bô(--無,問狀態)、--buē(--未,問完成)、--nih(--呢,帶推測的反問)。

教典直接用輕聲符號標:Lí tsia̍h-pá--buē?(你食飽未?);Pe̋nn hó guân-tsuân--buē?(病好原全未?)。

會當疊:khùn-pá--ah--nih(睏飽--矣--呢?)是完成貌 --ah 加推測 --nih;hó-sè--ah--buē(好勢--矣--未?)是 --ah 加 --buē。

病好原全未? Pēnn hó guân-tsuân--buē? 病痊癒了沒? 〔註〕--buē 未=完成問教典
代誌好勢矣未? Tāi-tsì hó-sè--ah--buē? 事情順利了嗎? 〔註〕--ah+--buē 疊用教典
你睏飽矣呢? Lí khùn-pá--ah--nih? 你睡飽了是嗎? 〔註〕--ah+--nih 推測反問教典

參考:TGGL 語法小專欄:各種疑問句的比較・TGGL 語法點 037「……未?」・教育部臺灣台語常用詞辭典(教典)例句——CC BY-ND 3.0 TW,標示來源

語法點檢索(TGGL 索引,外連原文)

來源:臺灣台語語料庫應用檢索系統(國家教育研究院)。本表只收語法點索引(編號、名稱、臺羅),語法說明佮例句依原站授權條款無佇咧重刊——點「原文」去查完整內容;謹此致謝教育部。

編號語法點臺羅群組

語法小專欄

    資料來源:iTaigi 華台對照典(CC0)・台華線頂對照典(CC BY-SA 4.0)・台灣植物名彙(CC BY-SA 4.0)・教育部「以本土語言標注臺灣地名」(CC BY 3.0 TW)・教育部學科術語臺灣台語對譯 STTI(依官方說明開放運用、標示來源)・新北市104學年度閩南語字音字形900例句工作坊(Taiwanese-Corpus,MIT;標示來源)・李江却台語文教基金會 LKK 用字表(標示來源)・教育部臺灣台語常用詞辭典(萌典版,CC BY-ND 3.0 TW;例句重刊標示來源)・寫台文主詞庫(延伸詞層;混合授權非商業,CC BY-NC-SA 成分完整揭露於 LICENSE)・iCorpus(CC BY 4.0)。 轉換核心佮輸入法仝一套(rime-phah-taibun,程式 MIT)。本工具非商業用途,僅作台語學習教育之用;各來源授權以原釋出條款為準。原理佮名詞見使用說明・網頁工具。